โอปุปฺผปตฺตา ติฏฺฐนฺติ ปทุมา กณฺณิกา พหู

มธุ ภิสมฺหา สวติ ขีรสปฺปิ มุฬาลิภิ ฯ

สมนฺตา เตน คนฺเธน นานาคนฺธสโมหิตา

กุมุทา อมฺพคนฺธี จ นยิตา ทิสฺสเร พหู ฯ

ชาตสฺสรสฺสานุกูลํ เกตกา ปุปฺผิตา พหู

สุผุลฺลา พนฺธุชีวา จ เสตวารี สุคนฺธิกา ฯ

กุมฺภีลา สสสุมารา ๑ จ คหกา ตตฺถ ชายเร

อุคฺคาหกา อชครา ตตฺถ ชาตสฺสเร พหู ฯ

ปาฐีนา ปาวุสา มจฺฉา พลชา มุญฺชโรหิตา

มจฺฉกจฺฉปสญฺฉนฺนา อโถ สปฏเกหิ ๒ จ ฯ

ปาเรวตา รวิหํสา กุกฺกุตฺถกา ๓ นทีจรา

ทินฺทิภา ๔ จกฺกวากา จ จปฺปกา ชีวชีวกา ฯ

กลนฺทกา อุกฺกุสา จ เสนกา อุทฺธรา พหู

โกตฺถกา สุกโปตา จ กุฬีรา ๕ จมรา พหู ฯ

กาเสนิยา ๖ จ ติลกา อุปชีวนฺติ ตํ สรํ

สีหา พฺยคฺฆา จ ทีปี จ อจฺฉโกกตรจฺฉโย ฯ

วานรา กินฺนรา เจว ทิสฺสนฺติ มม อสฺสเม

ตานิ คนฺธานิ ฆายนฺโต ภกฺขยนฺโต ผลานหํ ฯ

คนฺโธทกํ ปิวนฺโต จ วสามิ มม อสฺสเม

เอณิมิคา วราหา จ ปสทา ขุทฺทรูปกา ฯ #๑ ม. สุสุมารา ฯ ๒ ม. ยุ. ปปฏกาหิ ฯ ๓ ม. กุกฺกุตฺถา จ ฯ ๔ ยุ. ติฏีภา ฯ #๕ ม. ตุลิยา ฯ ๖ ม. กาเรนิโย ฯ ยุ. กาเรริโย ฯ