อิตฺถํ สุทํ อายสฺมา พกฺกุโล เถโร อิมา คาถาโย อภาสิตฺถาติ ฯ

พกฺกุลตฺเถรสฺส อปทานํ สมตฺตํ ฯ

สตฺตมํ คิริมานนฺทตฺเถราปทานํ (๓๙๗)

[๓๙๙] ภริยา เม กาลํ กตา ปุตฺโต สีวถิกํ คโต

มาตา ๑ ปิตา จ ภาตา จ เอกจิตมฺหิ ๒ ฑยฺหเร ฯ

เตน โสเกน สนฺตตฺโต กิโส ปณฺฑุ อโหสหํ

จิตฺตุกฺเขปญฺจ ๓ เม อาสิ เตน โสเกน อฑฺฑิโต ฯ

โสกสลฺลปเรโตปิ ๔ วนนฺตํ อุปสงฺกมึ

ปวตฺตผลํ ภุญฺชิตฺวา รุกฺขมูเล วสามหํ ฯ

สุเมโธ นาม สมฺพุทฺโธ ทุกฺขสฺสนฺตํ กโร ชิโน

มมุทฺธริตุกาโม โส อาคญฺฉิ มม สนฺติเก ๕ ฯ

ปทสทฺทํ สุณิตฺวาน สุเมธสฺส มเหสิโน

ปคฺคเหตฺวานหํ สีสํ โอโลเกสึ มหามุนึ ฯ

อุปคญฺฉิ ๖ มหาวีโร ปีติ เม อุปปชฺชถ

ตทาสิ เมกคฺคมโน ทิสฺวา ตํ โลกนายกํ ฯ

สตึ ปฏิลภิตฺวาน ปณฺณมุฏฺฐึ อทาสหํ

นิสีทิ ภควา ตตฺถ อนุกมฺปาย จกฺขุมา ฯ #๑ ม. มาตา ปิตา มตา ภาตา ฯ ๒ ยุ. เอกจิตกมฺหิ ... ฯ ๓ ม. จิตฺตกฺเขโป จ ... ฯ #๔ ม. ยุ. โสกสลฺลปเรโตหํ ฯ ๕ ม. สนฺติกํ ฯ ๖ ม. อุปาคเต มหาวีเร ฯ