ชีวิตํ ททมาเนน ยุตฺตํ ทาตุํ ตถาคตํ

ฐปนีโย มหาวีโร อเทยฺโย กสฺสจิ ชิโน ฯ

น เม ปฏิสฺสุโต พุทฺโธ วรสฺสุ อมิตํ ธนํ

วินิจฺฉยํ ปาปุณามิ ๑ ปุจฺฉิสฺสามิ ๒ วินิจฺฉเย ฯ

ยถา สณฺหํ กเถสฺสนฺติ ปฏิปุจฺฉาม ตํ ตถา

รญฺโญ หตฺเถ คเหตฺวาน อคมาสึ วินิจฺฉยํ ฯ

ปุรโต อกฺขทสฺสานํ อิทํ วจนมพฺรวึ

สุณนฺตุ เม อกฺขทสฺสา ราชา วรํ อทาสิ เม ฯ

น กิญฺจิ ฐปยิตฺวาน ชีวิตํปิ ปวารยึ ๓

ตสฺส เม วรทินฺนสฺส พุทฺธเสฏฺฐํ วรึ อหํ ฯ

สุทินฺโน โหติ เม พุทฺโธ ฉินฺทถ ๔ สํสยํ มม

สุสฺสาม ตว วจนํ ภูมิปาลสฺส ราชิโน ฯ

อุภินฺนํ วจนํ สุตฺวา ฉินฺทิสฺสาเมตฺถ สํสยํ

สพฺพํ เทว ตยา ทินฺนํ อิมสฺส สพฺพคาหิตํ ๕ ฯ

น กิญฺจิ ฐปยิตฺวาน ชีวิตํปิ ปวารยึ

กิจฺฉปฺปตฺโตว หุตฺวาน ยาวชีวมนุตฺตรํ ๖ ฯ

อิมํ สุทุกฺขิตํ ญตฺวา อทาสึ สพฺพคาหิตํ ๗

ปราชโย ตุวํ เทว อสฺส เทยฺโย ตถาคโต ฯ

อุภินฺนํ สํสโย ฉินฺโน ยถา สณฺฐมฺหิ ติฏฺฐถ

ราชา ตตฺเถว ฐตฺวาน อกฺขทสฺเสตทพฺรวิ ฯ #๑ ม. ยุ. ปาปุณาม ฯ ๒ ม. ยุ. ปุจฺฉิสฺสาม ฯ ๓ โป. ม. ยุ. ปวารยิ ฯ #๔ ยุ. อถวา ฯ ๕-๗ ม. ยุ. สพฺพคาหิกํ ฯ ๖ ม. ยุ. ยาจีวรมนุตฺตรํ ฯ