ตสฺส กญฺจนวณฺณสฺส ทิปทินฺทสฺส ตาทิโน

ปญฺจ สูจี มยา ทินฺนา สิพฺพนตฺถาย จีวรํ ฯ

เตเนว สูจิทาเนน นิปุณตฺถวิปสฺสกํ

ติกฺขลหุญฺจ ผาสุญฺจ ญาณํ เม อุปปชฺชถ ฯ

กิเลสา ฌาปิตา มยฺหํ ภวา สพฺเพ สมูหตา

ธาเรมิ อนฺติมํ เทหํ สมฺมาสมฺพุทฺธสาสเน ฯ

ทิปทาธิปติ นาม ราชาโน จตุโร อหุํ

สตฺตรตนสมฺปนฺนา จกฺกวตฺตี มหพฺพลา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา สูจิทายโก เถโร อิมา คาถาโย อภาสิตฺถาติ ฯ

สูจิทายกตฺเถรสฺส อปทานํ สมตฺตํ ฯ

อฏฺฐมํ ปาฏลิปุปฺผิยตฺเถราปทานํ (๗๘)

[๘๐] สุวณฺณวณฺณํ สมฺพุทฺธํ คจฺฉนฺตํ อนฺตราปเณ

กญฺจนคฺฆิยสงฺกาสํ ทฺวตฺตึสวรลกฺขณํ ฯ

เสฏฺฐิปุตฺโต ตทา อาสึ สุขุมาโล สุเข ฐิโต ๑

อุจฺฉงฺเค ปาฏลีปุปฺผํ กตฺวา ตํ อภิโรปยึ ฯ #๑ ม. สุเขธิโต ฯ