ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา องฺโกลปุปฺผิโย เถโร อิมา คาถาโย อภาสิตฺถาติ ฯ
องฺโกลปุปฺผิยตฺเถรสฺส อปทานํ สมตฺตํ ฯ
ฉฏฺฐํ กทมฺพปุปฺผิยตฺเถราปทานํ (๓๖๖)
[๓๖๘] สุวณฺณวณฺณํ สมฺพุทฺธํ คจฺฉนฺตํ อนฺตราปเณ
กญฺจนคฺฆิยสงฺกาสํ ทฺวตฺตึสวรลกฺขณํ ฯ
นิสชฺช ปาสาทวเร อทฺทสํ โลกนายกํ
กทมฺพปุปฺผํ ปคฺคยฺห วิปสฺสึ อภิปูชยึ ฯ
เอกนวุเต อิโต กปฺเป ยํ ปุปฺผมภิปูชยึ ๑
ทุคฺคตึ นาภิชานามิ พุทฺธปูชายิทํ ผลํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา กทมฺพปุปฺผิโย เถโร อิมา คาถาโย อภาสิตฺถาติ ฯ
กทมฺพปุปฺผิยตฺเถรสฺส อปทานํ สมตฺตํ ฯ
#๑ ม. ... พุทฺธมภิปูชยึ ฯ