สุวณฺณวณฺณํ สมฺพุทฺธํ สตรํสีว ภาณุมํ
วนนฺตรคตํ ทิสฺวา สาลราชํว ปุปฺผิตํ ฯ
รํเส ๑ จิตฺตํ ปสาเทตฺวา วิปสฺสิสฺส มเหสิโน
ปคฺคยฺห อญฺชลึ วนฺทึ สิรสา อุกฺกุฏิโก ๒ อหํ ฯ
เอกนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ รํสิสญฺญายิทํ ผลํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติ ฯ
รํสิสญฺญกตฺเถรสฺส อปทานํ สมตฺตํ ฯ
ฉฏฺฐํ รํสิสญฺญิกตฺเถราปทานํ (๘๖)
[๘๘] ปพฺพเต หิมวนฺตมฺหิ วากจีรธโร อหํ
จงฺกมํ จ สมารุโฬฺห นิสีทึ ปาจินามุโข ฯ
ปพฺพเต สุคตํ ทิสฺวา ผุสฺสํ ฌานรตํ สทา
อญฺชลึ ปคฺคเหตฺวาน รํเส จิตฺตํ ปสาทยึ ฯ
เทฺวนวุเต อิโต กปฺเป ยํ กมฺมมกรึ ๓ ตทา
ทุคฺคตึ นาภิชานามิ รํสิสญฺญายิทํ ผลํ ฯ #๑ ม. รํสยา ฯ ๒ ม. อุกฺกุฏี ฯ ๓ ม. ยุ. ยํ สญฺญมลภึ ตทา ฯ