Kathaṁ <b>viññāṇavantaṁ attānaṁ samanupassati?</b> Idhekacco rūpaṁ … vedanaṁ … saññaṁ … saṅkhāre attato samanupassati. Tassa evaṁ hoti— “ayaṁ kho me attā. So kho pana me ayaṁ attā iminā viññāṇena viññāṇavā”ti. Viññāṇavantaṁ attānaṁ samanupassati. Seyyathāpi rukkho chāyāsampanno assa. Tamenaṁ puriso evaṁ vadeyya— “ayaṁ rukkho, ayaṁ chāyā. Añño rukkho, aññā chāyā. So kho panāyaṁ rukkho imāya chāyāya chāyāvā”ti. Chāyāvantaṁ rukkhaṁ samanupassati. Evamevaṁ idhekacco rūpaṁ … vedanaṁ … saññaṁ … saṅkhāre attato samanupassati. Tassa evaṁ hoti— “ayaṁ kho me attā. So kho pana me ayaṁ attā iminā viññāṇena viññāṇavā”ti. Viññāṇavantaṁ attānaṁ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṁ vatthu. Yā ca diṭṭhi yañca vatthu— ayaṁ dutiyā viññāṇavatthukā attānudiṭṭhi. Attānudiṭṭhi micchādiṭṭhi …pe… imāni saññojanāni, na ca diṭṭhiyo. Evaṁ viññāṇavantaṁ attānaṁ samanupassati. Kathaṁ <b>attani viññāṇaṁ samanupassati?</b> Idhekacco rūpaṁ … vedanaṁ … saññaṁ … saṅkhāre attato samanupassati. Tassa evaṁ hoti— “ayaṁ kho me attā. Imasmiñca pana attani idaṁ viññāṇan”ti. Attani viññāṇaṁ samanupassati. Seyyathāpi pupphaṁ gandhasampannaṁ assa. Tamenaṁ puriso evaṁ vadeyya— “idaṁ pupphaṁ, ayaṁ gandho; aññaṁ pupphaṁ, añño gandho. So kho panāyaṁ gandho imasmiṁ pupphe”ti. Pupphasmiṁ gandhaṁ samanupassati. Evamevaṁ idhekacco rūpaṁ … vedanaṁ … saññaṁ … saṅkhāre attato samanupassati. Tassa evaṁ hoti— “ayaṁ kho me attā. Imasmiñca pana attani idaṁ viññāṇan”ti. Attani viññāṇaṁ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṁ vatthu. Yā ca diṭṭhi yañca vatthu— ayaṁ tatiyā viññāṇavatthukā attānudiṭṭhi. Attānudiṭṭhi micchādiṭṭhi …pe… imāni saññojanāni, na ca diṭṭhiyo. Evaṁ attani viññāṇaṁ samanupassati.