Arahattamaggassa sampahaṁsanā pariyosānaṁ. Pariyosānassa kati lakkhaṇāni? Pariyosānassa cattāri lakkhaṇāni. Tattha jātānaṁ dhammānaṁ anativattanaṭṭhena sampahaṁsanā, indriyānaṁ ekarasaṭṭhena sampahaṁsanā, tadupagavīriyavāhanaṭṭhena sampahaṁsanā, āsevanaṭṭhena sampahaṁsanā. Arahattamaggassa sampahaṁsanā pariyosānaṁ. Pariyosānassa imāni cattāri lakkhaṇāni. Tena vuccati— “arahattamaggo pariyosānakalyāṇo ceva hoti lakkhaṇasampanno ca”. Evaṁ tivattagataṁ cittaṁ tividhakalyāṇakaṁ dasalakkhaṇasampannaṁ vitakkasampannañceva hoti vicārasampannañca pītisampannañca sukhasampannañca cittassa adhiṭṭhānasampannañca saddhāsampannañca vīriyasampannañca satisampannañca samādhisampannañca paññāsampannañca. Nimittaṁ assāsapassāsā, Anārammaṇamekacittassa; Ajānato ca tayo dhamme, Bhāvanā nupalabbhati. Nimittaṁ assāsapassāsā, Anārammaṇamekacittassa; Jānato ca tayo dhamme, Bhāvanā upalabbhatīti.