Katamo <b>desanāmaṇḍo?</b> Catunnaṁ ariyasaccānaṁ ācikkhanā desanā paññāpanā paṭṭhapanā vivaraṇā vibhajanā uttānīkammaṁ, catunnaṁ satipaṭṭhānānaṁ …pe… catunnaṁ sammappadhānānaṁ … catunnaṁ iddhipādānaṁ … pañcannaṁ indriyānaṁ … pañcannaṁ balānaṁ … sattannaṁ bojjhaṅgānaṁ … ariyassa aṭṭhaṅgikassa maggassa ācikkhanā desanā paññāpanā paṭṭhapanā vivaraṇā vibhajanā uttānīkammaṁ— ayaṁ desanāmaṇḍo. Katamo <b>paṭiggahamaṇḍo?</b> Bhikkhū bhikkhuniyo upāsakā upāsikāyo devā manussā ye vā panaññepi keci viññātāro— ayaṁ paṭiggahamaṇḍo. Katamo <b>brahmacariyamaṇḍo?</b> Ayameva ariyo aṭṭhaṅgiko maggo, seyyathidaṁ— sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi— ayaṁ brahmacariyamaṇḍo. Adhimokkhamaṇḍo saddhindriyaṁ, assaddhiyaṁ kasaṭo; assaddhiyaṁ kasaṭaṁ chaḍḍetvā saddhindriyassa adhimokkhamaṇḍaṁ pivatīti— maṇḍapeyyaṁ. Paggahamaṇḍo vīriyindriyaṁ, kosajjaṁ kasaṭo; kosajjaṁ kasaṭaṁ chaḍḍetvā vīriyindriyassa paggahamaṇḍaṁ pivatīti— maṇḍapeyyaṁ. Upaṭṭhānamaṇḍo satindriyaṁ, pamādo kasaṭo; pamādaṁ kasaṭaṁ chaḍḍetvā satindriyassa upaṭṭhānamaṇḍaṁ pivatīti— maṇḍapeyyaṁ. Avikkhepamaṇḍo samādhindriyaṁ, uddhaccaṁ kasaṭo; uddhaccaṁ kasaṭaṁ chaḍḍetvā samādhindriyassa avikkhepamaṇḍaṁ pivatīti— maṇḍapeyyaṁ. Dassanamaṇḍo paññindriyaṁ, avijjā kasaṭo; avijjaṁ kasaṭaṁ chaḍḍetvā paññindriyassa dassanamaṇḍaṁ pivatīti— maṇḍapeyyaṁ.