Kathaṁ <b>paṭikūle ca appaṭikūle ca appaṭikūlasaññī viharati?</b> Aniṭṭhasmiñca iṭṭhasmiñca vatthusmiṁ mettāya vā pharati, dhātuto vā upasaṁharati. Evaṁ paṭikūle ca appaṭikūle ca appaṭikūlasaññī viharati. Kathaṁ <b>appaṭikūle ca paṭikūle ca paṭikūlasaññī viharati?</b> Iṭṭhasmiñca aniṭṭhasmiñca vatthusmiṁ asubhāya vā pharati, aniccato vā upasaṁharati. Evaṁ appaṭikūle ca paṭikūle ca paṭikūlasaññī viharati. Kathaṁ <b>paṭikūle ca appaṭikūle ca tadubhayaṁ abhinivajjetvā upekkhako viharati sato sampajāno?</b> Idha bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno. Sotena saddaṁ sutvā …pe… ghānena gandhaṁ ghāyitvā … jivhāya rasaṁ sāyitvā … kāyena phoṭṭhabbaṁ phusitvā … manasā dhammaṁ viññāya neva sumano hoti na dummano, upekkhako viharati sato sampajāno. Evaṁ paṭikūle ca appaṭikūle ca tadubhayaṁ abhinivajjetvā upekkhako viharati sato sampajāno. Ayaṁ ariyā iddhi. Katamā <b>kammavipākajā iddhi?</b> Sabbesaṁ pakkhīnaṁ, sabbesaṁ devānaṁ, ekaccānaṁ manussānaṁ, ekaccānaṁ vinipātikānaṁ. Ayaṁ kammavipākajā iddhi.
