Katamā <b>samādhivipphārā iddhi?</b> Paṭhamena jhānena nīvaraṇānaṁ pahānaṭṭho ijjhatīti— samādhivipphārā iddhi. Dutiyena jhānena vitakkavicārānaṁ pahānaṭṭho ijjhatīti— samādhivipphārā iddhi. Tatiyena jhānena pītiyā pahānaṭṭho ijjhatīti …pe… catutthena jhānena sukhadukkhānaṁ pahānaṭṭho ijjhatīti …pe… ākāsānañcāyatanasamāpattiyā rūpasaññāya paṭighasaññāya nānattasaññāya pahānaṭṭho ijjhatīti …pe… viññāṇañcāyatanasamāpattiyā ākāsānañcāyatanasaññāya pahānaṭṭho ijjhatīti …pe… ākiñcaññāyatanasamāpattiyā viññāṇañcāyatanasaññāya pahānaṭṭho ijjhatīti …pe… nevasaññānāsaññāyatanasamāpattiyā ākiñcaññāyatanasaññāya pahānaṭṭho ijjhatīti— samādhivipphārā iddhi. Āyasmato sāriputtassa samādhivipphārā iddhi, āyasmato sañjīvassa samādhivipphārā iddhi, āyasmato khāṇukoṇḍaññassa samādhivipphārā iddhi, uttarāya upāsikāya samādhivipphārā iddhi, sāmāvatiyā upāsikāya samādhivipphārā iddhi. Ayaṁ samādhivipphārā iddhi. Katamā <b>ariyā iddhi?</b> Idha bhikkhu sace ākaṅkhati— “paṭikūle appaṭikūlasaññī vihareyyan”ti, appaṭikūlasaññī tattha viharati. Sace ākaṅkhati— “appaṭikūle paṭikūlasaññī vihareyyan”ti, paṭikūlasaññī tattha viharati. Sace ākaṅkhati— “paṭikūle ca appaṭikūle ca appaṭikūlasaññī vihareyyan”ti, appaṭikūlasaññī tattha viharati. Sace ākaṅkhati— “appaṭikūle ca paṭikūle ca paṭikūlasaññī vihareyyan”ti, paṭikūlasaññī tattha viharati. Sace ākaṅkhati— “paṭikūle ca appaṭikūle ca tadubhayaṁ abhinivajjetvā upekkhako vihareyyaṁ sato sampajāno”ti, upekkhako tattha viharati sato sampajāno. Kathaṁ <b>paṭikūle appaṭikūlasaññī viharati?</b> Aniṭṭhasmiṁ vatthusmiṁ mettāya vā pharati, dhātuto vā upasaṁharati. Evaṁ paṭikūle appaṭikūlasaññī viharati. Kathaṁ <b>appaṭikūle paṭikūlasaññī viharati?</b> Iṭṭhasmiṁ vatthusmiṁ asubhāya vā pharati, aniccato vā upasaṁharati. Evaṁ appaṭikūle paṭikūlasaññī viharati.