Nocittasamuṭṭhāno dhammo cittasamuṭṭhānassa dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… vatthuṁ aniccato …pe… domanassaṁ uppajjati. Dibbena cakkhunā rūpaṁ passati, dibbāya sotadhātuyā saddaṁ suṇāti. Rūpāyatanaṁ cakkhuviññāṇasahagatānaṁ khandhānaṁ …pe… phoṭṭhabbāyatanaṁ …pe…. <b>Vatthupurejātaṁ</b>—cakkhāyatanaṁ cakkhuviññāṇasahagatānaṁ khandhānaṁ …pe… kāyāyatanaṁ …pe… vatthu cittasamuṭṭhānānaṁ khandhānaṁ purejātapaccayena paccayo. Nocittasamuṭṭhāno dhammo cittasamuṭṭhānassa ca nocittasamuṭṭhānassa ca dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… vatthuṁ aniccato …pe… taṁ ārabbha cittañca sampayuttakā ca khandhā uppajjanti. Dibbena cakkhunā rūpaṁ passati, dibbāya sotadhātuyā saddaṁ suṇāti. Rūpāyatanaṁ cakkhuviññāṇassa sampayuttakānañca khandhānaṁ …pe… phoṭṭhabbāyatanaṁ …pe…. <b>Vatthupurejātaṁ</b>—cakkhāyatanaṁ cakkhuviññāṇassa sampayuttakānañca khandhānaṁ …pe… kāyāyatanaṁ …pe… vatthu cittassa sampayuttakānañca khandhānaṁ purejātapaccayena paccayo. Cittasamuṭṭhāno ca nocittasamuṭṭhāno ca dhammā cittasamuṭṭhānassa dhammassa purejātapaccayena paccayo— <b>ārammaṇapurejātaṁ, vatthupurejātaṁ</b>. Cittasamuṭṭhānaṁ rūpāyatanañca cakkhāyatanañca cakkhuviññāṇasahagatānaṁ khandhānaṁ …pe… cittasamuṭṭhānaṁ phoṭṭhabbāyatanañca kāyāyatanañca kāyaviññāṇasahagatānaṁ khandhānaṁ purejātapaccayena paccayo; cittasamuṭṭhānaṁ rūpāyatanañca vatthu ca cittasamuṭṭhānānaṁ khandhānaṁ purejātapaccayena paccayo …pe… cittasamuṭṭhānaṁ phoṭṭhabbāyatanañca vatthu ca …pe…. Cittasamuṭṭhāno ca nocittasamuṭṭhāno ca dhammā nocittasamuṭṭhānassa dhammassa purejātapaccayena paccayo— <b>ārammaṇapurejātaṁ, vatthupurejātaṁ</b>. Cittasamuṭṭhānaṁ rūpāyatanañca cakkhāyatanañca cakkhuviññāṇassa …pe… cittasamuṭṭhānaṁ phoṭṭhabbāyatanañca kāyāyatanañca kāyaviññāṇassa purejātapaccayena paccayo; cittasamuṭṭhānaṁ rūpāyatanañca vatthu ca cittassa purejātapaccayena paccayo …pe… cittasamuṭṭhānaṁ phoṭṭhabbāyatanañca vatthu ca …pe….
