Ajjhattiko ca bāhiro ca dhammā ajjhattikassa dhammassa atthipaccayena paccayo— sahajātaṁ, purejātaṁ, pacchājātaṁ, āhāraṁ, indriyaṁ. <b>Sahajātā</b>—cakkhuviññāṇasahagatā khandhā ca cakkhāyatanañca cakkhuviññāṇassa atthipaccayena paccayo …pe… kāyaviññāṇasahagatā khandhā ca …pe… paṭisandhikkhaṇe ajjhattikā ca bāhirā ca khandhā ajjhattikānaṁ kaṭattārūpānaṁ atthipaccayena paccayo. <b>Purejātaṁ</b>—cakkhāyatanañca vatthu ca cittassa atthipaccayena paccayo …pe… kāyāyatanañca vatthu ca cittassa atthipaccayena paccayo; rūpāyatanañca cakkhāyatanañca cakkhuviññāṇassa …pe… phoṭṭhabbāyatanañca kāyāyatanañca kāyaviññāṇassa atthipaccayena paccayo. <b>Pacchājātā</b>—ajjhattikā ca bāhirā ca khandhā purejātassa imassa ajjhattikassa kāyassa atthipaccayena paccayo. <b>Pacchājātā</b>—ajjhattikā ca bāhirā ca khandhā kabaḷīkāro āhāro ca imassa ajjhattikassa kāyassa atthipaccayena paccayo. <b>Pacchājātā</b>—ajjhattikā ca bāhirā ca khandhā rūpajīvitindriyañca ajjhattikānaṁ kaṭattārūpānaṁ atthipaccayena paccayo. Ajjhattiko ca bāhiro ca dhammā bāhirassa dhammassa atthipaccayena paccayo— sahajātaṁ, purejātaṁ, pacchājātaṁ, āhāraṁ, indriyaṁ. <b>Sahajāto</b>—cakkhuviññāṇasahagato eko khandho ca cakkhāyatanañca cakkhuviññāṇañca dvinnaṁ khandhānaṁ atthipaccayena paccayo …pe…. (Sahajātapaccayavārasadisaṁ ninnānākaraṇaṁ, paṭhamagamanasadisaṁyeva. Sabbe padā paṭhamaghaṭanānayena vibhajitabbā.)