Cittānuparivattiṁ dhammaṁ paṭicca cittānuparivattī dhammo uppajjati hetupaccayā—cittānuparivattiṁ ekaṁ khandhaṁ paṭicca dve khandhā cittānuparivattiṁ cittasamuṭṭhānañca rūpaṁ, dve khandhe …pe… paṭisandhikkhaṇe …pe…. (Yathā cittasahabhūdukaṁ evaṁ imaṁ dukaṁ kātabbaṁ, ninnānākaraṇaṁ.) Cittānuparivattidukaṁ niṭṭhitaṁ. 2.10.9. Cittasaṁsaṭṭhasamuṭṭhānaduka 2.10.9.1. Paṭiccavāra 2.10.9.1.1. Paccayānuloma Vibhaṅgavāra Hetu Cittasaṁsaṭṭhasamuṭṭhānaṁ dhammaṁ paṭicca cittasaṁsaṭṭhasamuṭṭhāno dhammo uppajjati hetupaccayā—cittasaṁsaṭṭhasamuṭṭhānaṁ ekaṁ khandhaṁ paṭicca dve khandhā, dve khandhe paṭicca eko khandho; paṭisandhikkhaṇe …pe…. Cittasaṁsaṭṭhasamuṭṭhānaṁ dhammaṁ paṭicca nocittasaṁsaṭṭhasamuṭṭhāno dhammo uppajjati hetupaccayā—cittasaṁsaṭṭhasamuṭṭhāne khandhe paṭicca cittaṁ cittasamuṭṭhānañca rūpaṁ; paṭisandhikkhaṇe cittasaṁsaṭṭhasamuṭṭhāne khandhe paṭicca cittaṁ kaṭattā ca rūpaṁ.