Upādānasampayuttañca upādānavippayuttañca dhammaṁ paṭicca upādānavippayutto dhammo uppajjati naārammaṇapaccayā—upādānasampayutte khandhe ca mahābhūte ca paṭicca cittasamuṭṭhānaṁ rūpaṁ, diṭṭhigatavippayuttalobhasahagate khandhe ca lobhañca paṭicca cittasamuṭṭhānaṁ rūpaṁ. Naadhipatipaccayā … naanantarapaccayā … nasamanantarapaccayā … naupanissayapaccayā. Napurejātādi Upādānasampayuttaṁ dhammaṁ paṭicca upādānasampayutto dhammo uppajjati napurejātapaccayā—arūpe upādānasampayuttaṁ ekaṁ khandhaṁ paṭicca tayo khandhā …pe… dve khandhe …pe…. Upādānasampayuttaṁ dhammaṁ paṭicca upādānavippayutto dhammo uppajjati napurejātapaccayā—arūpe diṭṭhigatavippayuttalobhasahagate khandhe paṭicca lobho, upādānasampayutte khandhe paṭicca cittasamuṭṭhānaṁ rūpaṁ. Upādānasampayuttaṁ dhammaṁ paṭicca upādānasampayutto ca upādānavippayutto ca dhammā uppajjanti napurejātapaccayā—arūpe diṭṭhigatavippayuttalobhasahagataṁ ekaṁ khandhaṁ paṭicca tayo khandhā lobho ca …pe… dve khandhe …pe…. Upādānavippayuttaṁ dhammaṁ paṭicca upādānavippayutto dhammo uppajjati napurejātapaccayā—arūpe upādānavippayuttaṁ ekaṁ khandhaṁ paṭicca tayo khandhā …pe… dve khandhe …pe… upādānavippayutte khandhe paṭicca cittasamuṭṭhānaṁ rūpaṁ, diṭṭhigatavippayuttaṁ lobhaṁ paṭicca cittasamuṭṭhānaṁ rūpaṁ; paṭisandhikkhaṇe …pe…. (Yāva asaññasattā.)