Cittaṁ dhammaṁ paccayā nocitto dhammo uppajjati hetupaccayā—cittaṁ paccayā sampayuttakā khandhā cittasamuṭṭhānañca rūpaṁ; paṭisandhikkhaṇe …pe…. Nocittaṁ dhammaṁ paccayā nocitto dhammo uppajjati hetupaccayā—nocittaṁ ekaṁ khandhaṁ paccayā dve khandhā cittasamuṭṭhānañca rūpaṁ, dve khandhe …pe… paṭisandhikkhaṇe …pe… (yāva mahābhūtā), vatthuṁ paccayā nocittā khandhā. Nocittaṁ dhammaṁ paccayā citto dhammo uppajjati hetupaccayā—nocitte khandhe paccayā cittaṁ, vatthuṁ paccayā cittaṁ; paṭisandhikkhaṇe nocitte khandhe paccayā cittaṁ, paṭisandhikkhaṇe vatthuṁ paccayā cittaṁ. Nocittaṁ dhammaṁ paccayā citto ca nocitto ca dhammā uppajjanti hetupaccayā— nocittaṁ ekaṁ khandhaṁ paccayā dve khandhā cittañca cittasamuṭṭhānañca rūpaṁ, dve khandhe …pe… vatthuṁ paccayā cittañca sampayuttakā ca khandhā; paṭisandhikkhaṇe nocittaṁ ekaṁ khandhaṁ paccayā dve khandhā cittañca kaṭattā ca rūpaṁ, dve khandhe …pe… paṭisandhikkhaṇe vatthuṁ paccayā cittañca sampayuttakā ca khandhā.