Appītiko dhammo sappītikassa dhammassa adhipatipaccayena paccayo. <b>Ārammaṇādhipati</b>—appītikena cittena dānaṁ …pe… sīlaṁ …pe… uposathakammaṁ …pe… (saṅkhittaṁ) nibbānaṁ sappītikassa gotrabhussa, vodānassa, maggassa, phalassa adhipatipaccayena paccayo; cakkhuṁ …pe… vatthuṁ appītike khandhe ca pītiñca sappītikena cittena garuṁ katvā assādeti abhinandati, taṁ garuṁ katvā sappītiko rāgo uppajjati, diṭṭhi uppajjati; appītike khandhe ca pītiñca garuṁ katvā sappītikā khandhā uppajjanti. Appītiko dhammo sappītikassa ca appītikassa ca dhammassa adhipatipaccayena paccayo. <b>Ārammaṇādhipati</b>—dānaṁ …pe… (saṅkhittaṁ) nibbānaṁ sappītikassa gotrabhussa, vodānassa, maggassa, phalassa, pītiyā ca adhipatipaccayena paccayo; cakkhuṁ …pe… vatthuṁ appītike khandhe ca pītiñca sappītikena cittena garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati appītike khandhe ca pītiñca garuṁ katvā sappītikā khandhā ca pīti ca uppajjanti. Sappītiko ca appītiko ca dhammā sappītikassa dhammassa adhipatipaccayena paccayo. <b>Ārammaṇādhipati</b>—sappītike khandhe ca pītiñca garuṁ katvā sappītikā khandhā uppajjanti. (Mūlaṁ kātabbaṁ.) Sappītike khandhe ca pītiñca garuṁ katvā appītikā khandhā ca pīti ca uppajjanti. (Mūlaṁ kātabbaṁ.) Sappītike khandhe ca pītiñca garuṁ katvā sappītikā khandhā ca pīti ca uppajjanti. Anantarādi
