Arūpāvacaro dhammo arūpāvacarassa dhammassa hetupaccayena paccayo—arūpāvacarā hetū sampayuttakānaṁ khandhānaṁ hetupaccayena paccayo; paṭisandhikkhaṇe …pe…. (Mūlaṁ kātabbaṁ.) Arūpāvacarā hetū cittasamuṭṭhānānaṁ rūpānaṁ hetupaccayena paccayo. (Mūlaṁ kātabbaṁ.) Arūpāvacarā hetū sampayuttakānaṁ khandhānaṁ cittasamuṭṭhānānañca rūpānaṁ hetupaccayena paccayo. Naarūpāvacaro dhammo naarūpāvacarassa dhammassa hetupaccayena paccayo— naarūpāvacarā hetū sampayuttakānaṁ khandhānaṁ cittasamuṭṭhānānañca rūpānaṁ hetupaccayena paccayo; paṭisandhikkhaṇe …pe…. Ārammaṇa Arūpāvacaro dhammo arūpāvacarassa dhammassa ārammaṇapaccayena paccayo— ākāsānañcāyatanaṁ viññāṇañcāyatanassa ārammaṇapaccayena paccayo; ākiñcaññāyatanaṁ nevasaññānāsaññāyatanassa ārammaṇapaccayena paccayo. Arūpāvacaro dhammo naarūpāvacarassa dhammassa ārammaṇapaccayena paccayo— ākāsānañcāyatanaṁ paccavekkhati, viññāṇañcāyatanaṁ …pe… ākiñcaññāyatanaṁ …pe… nevasaññānāsaññāyatanaṁ paccavekkhati, arūpāvacare khandhe aniccato …pe… domanassaṁ uppajjati; cetopariyañāṇena arūpāvacaracittasamaṅgissa cittaṁ jānāti, arūpāvacarā khandhā cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo.