Nakāmāvacaro dhammo nakāmāvacarassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—nakāmāvacaraṁ saddhaṁ upanissāya jhānaṁ uppādeti, maggaṁ …pe… abhiññaṁ …pe… samāpattiṁ uppādeti; nakāmāvacaraṁ sīlaṁ …pe… paññaṁ upanissāya nakāmāvacaraṁ jhānaṁ uppādeti …pe… maggaṁ …pe… abhiññaṁ …pe… samāpattiṁ uppādeti; nakāmāvacarā saddhā …pe… paññā nakāmāvacarāya saddhāya …pe… paññāya, maggassa, phalasamāpattiyā upanissayapaccayena paccayo; paṭhamaṁ jhānaṁ dutiyassa jhānassa upanissayapaccayena paccayo …pe… tatiyaṁ jhānaṁ …pe… catutthaṁ jhānaṁ …pe… ākāsānañcāyatanaṁ viññāṇañcāyatanassa …pe… ākiñcaññāyatanaṁ nevasaññānāsaññāyatanassa upanissayapaccayena paccayo; paṭhamo maggo dutiyassa maggassa …pe… dutiyo maggo tatiyassa maggassa …pe… tatiyo maggo catutthassa maggassa upanissayapaccayena paccayo; maggo phalasamāpattiyā upanissayapaccayena paccayo.