Nahetupaccayā ārammaṇe nava, adhipatiyā nava. (Anulomamātikā kātabbā.) Cittadukaṁ niṭṭhitaṁ. 2.10.3. Cetasikaduka 2.10.3.1. Paṭiccavāra 2.10.3.1.1. Paccayānuloma Vibhaṅgavāra Hetu Cetasikaṁ dhammaṁ paṭicca cetasiko dhammo uppajjati hetupaccayā—cetasikaṁ ekaṁ khandhaṁ paṭicca dve khandhā, dve khandhe paṭicca eko khandho; paṭisandhikkhaṇe …pe…. Cetasikaṁ dhammaṁ paṭicca acetasiko dhammo uppajjati hetupaccayā—cetasike khandhe paṭicca cittañca cittasamuṭṭhānañca rūpaṁ; paṭisandhikkhaṇe cetasike khandhe paṭicca cittañca kaṭattā ca rūpaṁ. Cetasikaṁ dhammaṁ paṭicca cetasiko ca acetasiko ca dhammā uppajjanti hetupaccayā—cetasikaṁ ekaṁ khandhaṁ paṭicca dve khandhā cittañca cittasamuṭṭhānañca rūpaṁ, dve khandhe …pe… paṭisandhikkhaṇe …pe…. Acetasikaṁ dhammaṁ paṭicca acetasiko dhammo uppajjati hetupaccayā—cittaṁ paṭicca cittasamuṭṭhānaṁ rūpaṁ; paṭisandhikkhaṇe cittaṁ paṭicca kaṭattārūpaṁ, cittaṁ paṭicca vatthu, vatthuṁ paṭicca cittaṁ, ekaṁ mahābhūtaṁ …pe… mahābhūte paṭicca cittasamuṭṭhānaṁ rūpaṁ kaṭattārūpaṁ upādārūpaṁ.