Upādānavippayuttaṁ dhammaṁ paccayā upādānavippayutto dhammo uppajjati nahetupaccayā—ahetukaṁ upādānavippayuttaṁ ekaṁ khandhaṁ paccayā …pe… (yāva asaññasattā) cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ …pe… vatthuṁ paccayā ahetukā upādānavippayuttā khandhā, vicikicchāsahagate uddhaccasahagate khandhe ca vatthuñca paccayā vicikicchāsahagato uddhaccasahagato moho. (Saṅkhittaṁ.) Saṅkhyāvāra Suddha Nahetuyā ekaṁ, naārammaṇe tīṇi, naadhipatiyā nava, naanantare tīṇi, nasamanantare tīṇi, naaññamaññe tīṇi, naupanissaye tīṇi, napurejāte satta, napacchājāte nava, naāsevane nava, nakamme cattāri, navipāke nava, naāhāre ekaṁ, naindriye ekaṁ, najhāne ekaṁ, namagge ekaṁ, nasampayutte tīṇi, navippayutte cha, nonatthiyā tīṇi, novigate tīṇi. 2.11.3.4. Nissayavāra Evaṁ itare dve gaṇanāpi nissayavāropi kātabbo. 2.11.3.5. Saṁsaṭṭhavāra 2.11.3.5.1–4 Paccayānulomādi Upādānasampayuttaṁ dhammaṁ saṁsaṭṭho upādānasampayutto dhammo uppajjati hetupaccayā—upādānasampayuttaṁ ekaṁ khandhaṁ saṁsaṭṭhā … tīṇi. Upādānavippayuttaṁ dhammaṁ saṁsaṭṭho upādānavippayutto dhammo uppajjati hetupaccayā. (Paṭiccasadisaṁ, arūpaṁyeva kātabbaṁ.) Upādānavippayuttaṁ dhammaṁ saṁsaṭṭho upādānasampayutto dhammo uppajjati hetupaccayā. (Paṭiccasadisaṁ, arūpaṁyeva kātabbaṁ.)