Ajjhattiko dhammo ajjhattikassa dhammassa indriyapaccayena paccayo— paṭisandhikkhaṇe ajjhattikā indriyā ajjhattikānaṁ kaṭattārūpānaṁ indriyapaccayena paccayo, cakkhundriyaṁ cakkhuviññāṇassa …pe… kāyindriyaṁ kāyaviññāṇassa indriyapaccayena paccayo. Ajjhattiko dhammo bāhirassa dhammassa indriyapaccayena paccayo—ajjhattikā indriyā sampayuttakānaṁ khandhānaṁ cittasamuṭṭhānānañca rūpānaṁ indriyapaccayena paccayo; paṭisandhikkhaṇe ajjhattikā indriyā sampayuttakānaṁ khandhānaṁ bāhirānañca kaṭattārūpānaṁ indriyapaccayena paccayo, cakkhundriyaṁ cakkhuviññāṇasahagatānaṁ khandhānaṁ …pe… kāyindriyaṁ kāyaviññāṇasahagatānaṁ khandhānaṁ indriyapaccayena paccayo. Ajjhattiko dhammo ajjhattikassa ca bāhirassa ca dhammassa indriyapaccayena paccayo—paṭisandhikkhaṇe ajjhattikā indriyā sampayuttakānaṁ khandhānaṁ ajjhattikānañca bāhirānañca kaṭattārūpānaṁ indriyapaccayena paccayo, cakkhundriyaṁ cakkhuviññāṇassa sampayuttakānañca khandhānaṁ …pe… kāyindriyaṁ kāyaviññāṇassa sampayuttakānañca khandhānaṁ indriyapaccayena paccayo.