Cittasamuṭṭhānañca nocittasamuṭṭhānañca dhammaṁ paṭicca nocittasamuṭṭhāno dhammo uppajjati nahetupaccayā—ahetukapaṭisandhikkhaṇe cittasamuṭṭhāne khandhe ca cittañca paṭicca kaṭattārūpaṁ; ahetukapaṭisandhikkhaṇe cittasamuṭṭhāne khandhe ca mahābhūte ca paṭicca kaṭattārūpaṁ, ahetukapaṭisandhikkhaṇe cittasamuṭṭhāne khandhe ca vatthuñca paṭicca cittaṁ. Cittasamuṭṭhānañca nocittasamuṭṭhānañca dhammaṁ paṭicca cittasamuṭṭhāno ca nocittasamuṭṭhāno ca dhammā uppajjanti nahetupaccayā—ahetukapaṭisandhikkhaṇe cittasamuṭṭhānaṁ ekaṁ khandhañca cittañca paṭicca dve khandhā kaṭattā ca rūpaṁ, dve khandhe …pe… ahetukapaṭisandhikkhaṇe cittasamuṭṭhānaṁ ekaṁ khandhañca vatthuñca paṭicca dve khandhā cittañca, dve khandhe …pe…. Naārammaṇa Cittasamuṭṭhānaṁ dhammaṁ paṭicca cittasamuṭṭhāno dhammo uppajjati naārammaṇapaccayā—cittasamuṭṭhāne khandhe paṭicca cittasamuṭṭhānaṁ rūpaṁ, cittasamuṭṭhānaṁ ekaṁ mahābhūtaṁ …pe… mahābhūte paṭicca cittasamuṭṭhānaṁ rūpaṁ, upādārūpaṁ. Cittasamuṭṭhānaṁ dhammaṁ paṭicca nocittasamuṭṭhāno dhammo uppajjati naārammaṇapaccayā—paṭisandhikkhaṇe cittasamuṭṭhāne khandhe paṭicca kaṭattārūpaṁ. Nocittasamuṭṭhānaṁ dhammaṁ paṭicca nocittasamuṭṭhāno dhammo uppajjati naārammaṇapaccayā—paṭisandhikkhaṇe cittaṁ paṭicca kaṭattārūpaṁ, cittaṁ paṭicca vatthu, ekaṁ mahābhūtaṁ …pe…. (Yāva asaññasattā.)