Naupekkhāsahagato dhammo naupekkhāsahagatassa dhammassa anantarapaccayena paccayo—purimā purimā upekkhā pacchimāya pacchimāya upekkhāya anantarapaccayena paccayo; purimā purimā naupekkhāsahagatā khandhā pacchimānaṁ pacchimānaṁ naupekkhāsahagatānaṁ khandhānaṁ anantarapaccayena paccayo; anulomaṁ gotrabhussa …pe… anulomaṁ phalasamāpattiyā anantarapaccayena paccayo. (Mūlaṁ kātabbaṁ.) Purimā purimā upekkhā pacchimānaṁ pacchimānaṁ upekkhāsahagatānaṁ khandhānaṁ anantarapaccayena paccayo; naupekkhāsahagataṁ cuticittaṁ upekkhāsahagatassa upapatticittassa … naupekkhāsahagataṁ bhavaṅgaṁ āvajjanāya … kāyaviññāṇadhātu vipākamanodhātuyā … naupekkhāsahagatā vipākamanoviññāṇadhātu kiriyamanoviññāṇadhātuyā … naupekkhāsahagataṁ bhavaṅgaṁ upekkhāsahagatassa bhavaṅgassa … naupekkhāsahagataṁ kusalākusalaṁ upekkhāsahagatassa vuṭṭhānassa … kiriyaṁ vuṭṭhānassa … phalaṁ vuṭṭhānassa anantarapaccayena paccayo. Naupekkhāsahagato dhammo upekkhāsahagatassa ca naupekkhāsahagatassa ca dhammassa anantarapaccayena paccayo—purimā purimā upekkhā pacchimānaṁ pacchimānaṁ upekkhāsahagatānaṁ khandhānaṁ upekkhāya ca anantarapaccayena paccayo.