Upādā dhammo noupādā dhammassa atthipaccayena paccayo—sahajātaṁ, purejātaṁ, āhāraṁ, indriyaṁ. <b>Sahajātaṁ</b>—paṭisandhikkhaṇe vatthu noupādā khandhānaṁ atthipaccayena paccayo. <b>Purejātaṁ</b>—cakkhuṁ aniccato …pe…. (Saṅkhittaṁ. Purejātasadisaṁ ninnānākaraṇaṁ.) <b>Kabaḷīkāro āhāro</b>—imassa noupādā kāyassa atthipaccayena paccayo. <b>Rūpajīvitindriyaṁ</b>—noupādā kaṭattārūpānaṁ atthipaccayena paccayo. Upādā dhammo upādā dhammassa ca noupādā dhammassa ca atthipaccayena paccayo— āhāraṁ, indriyaṁ. <b>Kabaḷīkāro āhāro</b>—imassa upādā kāyassa ca noupādā kāyassa ca atthipaccayena paccayo. <b>Rūpajīvitindriyaṁ</b>—upādā ca noupādā ca kaṭattārūpānaṁ atthipaccayena paccayo. Noupādā dhammo noupādā dhammassa atthipaccayena paccayo—sahajātaṁ, purejātaṁ, pacchājātaṁ. <b>Sahajāto</b>—noupādā eko khandho tiṇṇannaṁ khandhānaṁ noupādā ca cittasamuṭṭhānānaṁ rūpānaṁ atthipaccayena paccayo …pe… dve khandhā …pe… paṭisandhikkhaṇe …pe… ekaṁ mahābhūtaṁ tiṇṇannaṁ mahābhūtānaṁ atthipaccayena paccayo …pe… dve mahābhūtā dvinnaṁ mahābhūtānaṁ atthipaccayena paccayo (yāva asaññasattā). <b>Purejātaṁ</b>—phoṭṭhabbe aniccato …pe… domanassaṁ uppajjati. Phoṭṭhabbāyatanaṁ kāyaviññāṇassa atthipaccayena paccayo. <b>Pacchājātā</b>—noupādā khandhā purejātassa imassa noupādā kāyassa atthipaccayena paccayo. Noupādā dhammo upādā dhammassa atthipaccayena paccayo—sahajātaṁ, pacchājātaṁ. <b>Sahajātā</b>—noupādā khandhā upādā cittasamuṭṭhānānaṁ rūpānaṁ atthipaccayena paccayo; paṭisandhikkhaṇe …pe…. <b>Pacchājātā</b>—noupādā khandhā purejātassa imassa upādā kāyassa atthipaccayena paccayo.