Kāmāvacaro dhammo kāmāvacarassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—kāmāvacaraṁ saddhaṁ upanissāya dānaṁ deti …pe… sīlaṁ …pe… uposathakammaṁ …pe… vipassanaṁ uppādeti, mānaṁ jappeti, diṭṭhiṁ gaṇhāti; kāmāvacaraṁ sīlaṁ …pe… paññaṁ … rāgaṁ …pe… patthanaṁ … kāyikaṁ sukhaṁ … kāyikaṁ dukkhaṁ … utuṁ … bhojanaṁ … senāsanaṁ upanissāya dānaṁ deti …pe… vipassanaṁ uppādeti, pāṇaṁ hanati …pe… saṅghaṁ bhindati; kāmāvacarā saddhā …pe… senāsanaṁ kāmāvacarāya saddhāya …pe… patthanāya … kāyikassa sukhassa … kāyikassa dukkhassa upanissayapaccayena paccayo. Kāmāvacaro dhammo nakāmāvacarassa dhammassa upanissayapaccayena paccayo— anantarūpanissayo, pakatūpanissayo …pe…. <b>Pakatūpanissayo</b>—kāmāvacaraṁ saddhaṁ upanissāya nakāmāvacaraṁ jhānaṁ uppādeti, maggaṁ …pe… abhiññaṁ …pe… samāpattiṁ uppādeti; kāmāvacaraṁ sīlaṁ …pe… senāsanaṁ upanissāya nakāmāvacaraṁ jhānaṁ uppādeti, maggaṁ …pe… abhiññaṁ …pe… samāpattiṁ uppādeti; kāmāvacarā saddhā …pe… senāsanaṁ nakāmāvacarāya saddhāya …pe… paññāya … maggassa, phalasamāpattiyā upanissayapaccayena paccayo; paṭhamassa jhānassa parikammaṁ paṭhamassa jhānassa …pe… catutthassa jhānassa …pe… ākāsānañcāyatanassa …pe… paṭhamassa maggassa …pe… catutthassa maggassa parikammaṁ catutthassa maggassa upanissayapaccayena paccayo.