Nocittasaṁsaṭṭhasamuṭṭhāno dhammo cittasaṁsaṭṭhasamuṭṭhānassa dhammassa atthipaccayena paccayo—sahajātaṁ, purejātaṁ. <b>Sahajātaṁ</b>—cittaṁ sampayuttakānaṁ khandhānaṁ atthipaccayena paccayo; paṭisandhikkhaṇe cittaṁ sampayuttakānaṁ khandhānaṁ atthipaccayena paccayo, paṭisandhikkhaṇe vatthu cittasaṁsaṭṭhasamuṭṭhānānaṁ khandhānaṁ atthipaccayena paccayo. (<b>Purejātaṁ</b>—purejātasadisaṁ, ninnānākaraṇaṁ.) Nocittasaṁsaṭṭhasamuṭṭhāno dhammo cittasaṁsaṭṭhasamuṭṭhānassa ca nocittasaṁsaṭṭhasamuṭṭhānassa ca dhammassa atthipaccayena paccayo—sahajātaṁ, purejātaṁ. <b>Sahajātaṁ</b>—cittaṁ sampayuttakānaṁ khandhānaṁ cittasamuṭṭhānānañca rūpānaṁ atthipaccayena paccayo; paṭisandhikkhaṇe cittaṁ sampayuttakānaṁ khandhānaṁ kaṭattā ca rūpānaṁ atthipaccayena paccayo, paṭisandhikkhaṇe vatthu cittassa sampayuttakānañca khandhānaṁ atthipaccayena paccayo. <b>Purejātaṁ</b>. (Purejātasadisaṁ.) Cittasaṁsaṭṭhasamuṭṭhāno ca nocittasaṁsaṭṭhasamuṭṭhāno ca dhammā cittasaṁsaṭṭhasamuṭṭhānassa dhammassa atthipaccayena paccayo—sahajātaṁ, purejātaṁ. <b>Sahajāto</b>—cakkhuviññāṇasahagato eko khandho ca cakkhuviññāṇañca dvinnaṁ khandhānaṁ …pe… dve khandhā ca …pe… cakkhuviññāṇasahagato eko khandho ca cakkhāyatanañca dvinnaṁ khandhānaṁ …pe… dve khandhā ca …pe… kāyaviññāṇasahagato …pe… cittasaṁsaṭṭhasamuṭṭhāno eko khandho ca cittañca dvinnaṁ khandhānaṁ atthipaccayena paccayo, dve khandhā ca …pe… cittasaṁsaṭṭhasamuṭṭhāno eko khandho ca vatthu ca dvinnaṁ khandhānaṁ atthipaccayena paccayo …pe… dve khandhā ca …pe…. (Paṭisandhikkhaṇe dvepi kātabbā.)