Narūpāvacaro dhammo narūpāvacarassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—dānaṁ …pe… sīlaṁ …pe… uposathakammaṁ …pe… pubbe suciṇṇāni garuṁ katvā paccavekkhati assādeti abhinandati, taṁ garuṁ katvā rāgo uppajjati, diṭṭhi uppajjati; ariyā maggā vuṭṭhahitvā maggaṁ garuṁ katvā …pe… phalaṁ …pe… nibbānaṁ garuṁ katvā paccavekkhanti, nibbānaṁ gotrabhussa, vodānassa, maggassa, phalassa adhipatipaccayena paccayo; cakkhuṁ …pe… vatthuṁ narūpāvacare khandhe garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati; ākāsānañcāyatanaṁ garuṁ katvā paccavekkhati …pe… nevasaññānāsaññāyatanaṁ garuṁ katvā paccavekkhati. <b>Sahajātādhipati</b>—narūpāvacarādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Anantarādi Rūpāvacaro dhammo rūpāvacarassa dhammassa anantarapaccayena paccayo—purimā purimā rūpāvacarā khandhā pacchimānaṁ pacchimānaṁ rūpāvacarānaṁ khandhānaṁ anantarapaccayena paccayo. Rūpāvacaro dhammo narūpāvacarassa dhammassa anantarapaccayena paccayo—rūpāvacaraṁ cuticittaṁ narūpāvacarassa upapatticittassa anantarapaccayena paccayo; rūpāvacaraṁ bhavaṅgaṁ āvajjanāya … rūpāvacarā khandhā narūpāvacarassa vuṭṭhānassa anantarapaccayena paccayo.