Sārammaṇaṁ dhammaṁ saṁsaṭṭho sārammaṇo dhammo uppajjati hetupaccayā— sārammaṇaṁ ekaṁ khandhaṁ saṁsaṭṭhā tayo khandhā …pe… dve khandhe saṁsaṭṭhā dve khandhā; paṭisandhikkhaṇe …pe…. Hetuyā ekaṁ, ārammaṇe ekaṁ, adhipatiyā ekaṁ (sabbattha ekaṁ), avigate ekaṁ. Anulomaṁ. Sārammaṇaṁ dhammaṁ saṁsaṭṭho sārammaṇo dhammo uppajjati nahetupaccayā— ahetukaṁ sārammaṇaṁ ekaṁ khandhaṁ saṁsaṭṭhā tayo khandhā …pe… dve khandhe …pe… vicikicchāsahagate uddhaccasahagate khandhe saṁsaṭṭho vicikicchāsahagato uddhaccasahagato moho. (Saṅkhittaṁ.) Nahetuyā ekaṁ, naadhipatiyā ekaṁ, napurejāte ekaṁ, napacchājāte ekaṁ, naāsevane ekaṁ, nakamme ekaṁ, navipāke ekaṁ, najhāne ekaṁ, namagge ekaṁ, navippayutte ekaṁ. Paccanīyaṁ. 2.10.1.6. Sampayuttavāra Evaṁ itare dve gaṇanāpi sampayuttavāropi kātabbo. 2.10.1.7. Pañhāvāra 2.10.1.7.1. Paccayānuloma Vibhaṅgavāra Hetu Sārammaṇo dhammo sārammaṇassa dhammassa hetupaccayena paccayo—sārammaṇā hetū sampayuttakānaṁ khandhānaṁ hetupaccayena paccayo; paṭisandhikkhaṇe …pe…. Sārammaṇo dhammo anārammaṇassa dhammassa hetupaccayena paccayo—sārammaṇā hetū cittasamuṭṭhānānaṁ rūpānaṁ hetupaccayena paccayo; paṭisandhikkhaṇe …pe….