Ajjhattiko dhammo ajjhattikassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… kāyaṁ aniccato …pe… vipassati, assādeti abhinandati, taṁ ārabbha cittaṁ uppajjati. <b>Vatthupurejātaṁ</b>—cakkhāyatanaṁ cakkhuviññāṇassa …pe… kāyāyatanaṁ kāyaviññāṇassa purejātapaccayena paccayo. Ajjhattiko dhammo bāhirassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… kāyaṁ aniccato …pe… vipassati, assādeti …pe… domanassaṁ uppajjati. <b>Vatthupurejātaṁ</b>—cakkhāyatanaṁ cakkhuviññāṇasahagatānaṁ khandhānaṁ …pe… kāyāyatanaṁ kāyaviññāṇasahagatānaṁ khandhānaṁ purejātapaccayena paccayo. Ajjhattiko dhammo ajjhattikassa ca bāhirassa ca dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… kāyaṁ aniccato …pe… vipassati, taṁ ārabbha cittañca sampayuttakā khandhā ca uppajjanti. <b>Vatthupurejātaṁ</b>—cakkhāyatanaṁ cakkhuviññāṇassa sampayuttakānañca khandhānaṁ …pe… kāyāyatanaṁ kāyaviññāṇassa sampayuttakānañca khandhānaṁ purejātapaccayena paccayo. Bāhiro dhammo bāhirassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—rūpe …pe… phoṭṭhabbe … vatthuṁ aniccato …pe… domanassaṁ uppajjati; dibbena cakkhunā rūpaṁ passati, dibbāya sotadhātuyā saddaṁ suṇāti. <b>Vatthupurejātaṁ</b>—vatthu bāhirānaṁ khandhānaṁ purejātapaccayena paccayo. Bāhiro dhammo ajjhattikassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—rūpe …pe… phoṭṭhabbe … vatthuṁ aniccato …pe… taṁ ārabbha cittaṁ uppajjati. Dibbena cakkhunā rūpaṁ passati, dibbāya sotadhātuyā saddaṁ suṇāti. <b>Vatthupurejātaṁ</b>—vatthu cittassa purejātapaccayena paccayo.