Nokileso dhammo kilesassa ca nokilesassa ca dhammassa kammapaccayena paccayo— nokilesā cetanā sampayuttakānaṁ khandhānaṁ kilesānaṁ cittasamuṭṭhānānañca rūpānaṁ kammapaccayena paccayo. Vipākādi Nokileso dhammo nokilesassa dhammassa vipākapaccayena paccayo … ekaṁ … āhārapaccayena paccayo … tīṇi … indriyapaccayena paccayo … tīṇi … jhānapaccayena paccayo … tīṇi … maggapaccayena paccayo … nava … sampayuttapaccayena paccayo … nava. Vippayutta Kileso dhammo nokilesassa dhammassa vippayuttapaccayena paccayo—sahajātaṁ, pacchājātaṁ. (Saṅkhittaṁ.) Nokileso dhammo nokilesassa dhammassa vippayuttapaccayena paccayo—sahajātaṁ, purejātaṁ, pacchājātaṁ. (Saṅkhittaṁ.) Nokileso dhammo kilesassa dhammassa vippayuttapaccayena paccayo. <b>Purejātaṁ</b>—vatthu kilesānaṁ vippayuttapaccayena paccayo. Nokileso dhammo kilesassa ca nokilesassa ca dhammassa vippayuttapaccayena paccayo. <b>Purejātaṁ</b>—vatthu kilesānaṁ sampayuttakānañca khandhānaṁ vippayuttapaccayena paccayo. Kileso ca nokileso ca dhammā nokilesassa dhammassa vippayuttapaccayena paccayo—sahajātaṁ, pacchājātaṁ. (Saṅkhittaṁ. Vitthāretabbaṁ.) Atthyādi Kileso dhammo kilesassa dhammassa atthipaccayena paccayo … ekaṁ. (Paṭiccasadisaṁ.) Kileso dhammo nokilesassa dhammassa atthipaccayena paccayo—sahajātaṁ, pacchājātaṁ. (Saṅkhittaṁ.)