Upādāno dhammo noupādānassa dhammassa pacchājātapaccayena paccayo. (Saṅkhittaṁ.) Noupādāno dhammo noupādānassa dhammassa pacchājātapaccayena paccayo. (Saṅkhittaṁ.) Upādāno ca noupādāno ca dhammā noupādānassa dhammassa pacchājātapaccayena paccayo. (Saṅkhittaṁ.) … Āsevanapaccayena paccayo. Kamma Noupādāno dhammo noupādānassa dhammassa kammapaccayena paccayo—sahajātā, nānākkhaṇikā. <b>Sahajātā</b>—noupādānā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo; paṭisandhikkhaṇe …pe…. <b>Nānākkhaṇikā</b>—noupādānā cetanā vipākānaṁ khandhānaṁ kaṭattā ca rūpānaṁ kammapaccayena paccayo. Noupādāno dhammo upādānassa dhammassa kammapaccayena paccayo—noupādānā cetanā sampayuttakānaṁ upādānānaṁ kammapaccayena paccayo. Noupādāno dhammo upādānassa ca noupādānassa ca dhammassa kammapaccayena paccayo—noupādānā cetanā sampayuttakānaṁ khandhānaṁ upādānānañca cittasamuṭṭhānānaṁ rūpānaṁ kammapaccayena paccayo. Vipākādi Noupādāno dhammo noupādānassa dhammassa vipākapaccayena paccayo—vipāko noupādāno eko khandho …pe… ekaṁ. Noupādāno dhammo noupādānassa dhammassa āhārapaccayena paccayo … tīṇi (ekoyeva kabaḷīkāro āhāro) … indriyapaccayena paccayo … tīṇi (rūpajīvitindriyaṁ ekaṁyeva) … jhānapaccayena paccayo … tīṇi.