Kathaṁ adhiṭṭhāne paññā <b>cittavivaṭṭe ñāṇaṁ</b>? Kāmacchandaṁ pajahanto nekkhammavasena cittaṁ adhiṭṭhātīti— adhiṭṭhāne paññā cittavivaṭṭe ñāṇaṁ. Byāpādaṁ pajahanto abyāpādavasena cittaṁ adhiṭṭhātīti— adhiṭṭhāne paññā cittavivaṭṭe ñāṇaṁ. Thinamiddhaṁ pajahanto ālokasaññāvasena cittaṁ adhiṭṭhātīti— adhiṭṭhāne paññā cittavivaṭṭe ñāṇaṁ …pe… sabbakilese pajahanto arahattamaggavasena cittaṁ adhiṭṭhātīti— adhiṭṭhāne paññā cittavivaṭṭe ñāṇaṁ. Taṁ ñātaṭṭhena ñāṇaṁ, pajānanaṭṭhena paññā. Tena vuccati— “adhiṭṭhāne paññā cittavivaṭṭe ñāṇaṁ”. Kathaṁ suññate paññā <b>ñāṇavivaṭṭe ñāṇaṁ</b>? “Cakkhu suññaṁ attena vā attaniyena vā niccena vā dhuvena vā sassatena vā avipariṇāmadhammena vā”ti yathābhūtaṁ jānato passato cakkhābhinivesato ñāṇaṁ vivaṭṭatīti— suññate paññā ñāṇavivaṭṭe ñāṇaṁ. “Sotaṁ suññaṁ …pe… ghānaṁ suññaṁ … jivhā suññā … kāyo suñño … mano suñño attena vā attaniyena vā niccena vā dhuvena vā sassatena vā avipariṇāmadhammena vā”ti yathābhūtaṁ jānato passato manābhinivesato ñāṇaṁ vivaṭṭatīti— suññate paññā ñāṇavivaṭṭe ñāṇaṁ. Taṁ ñātaṭṭhena ñāṇaṁ, pajānanaṭṭhena paññā. Tena vuccati— “suññate paññā ñāṇavivaṭṭe ñāṇaṁ”.