Kathaṁ vosagge paññā <b>vimokkhavivaṭṭe ñāṇaṁ</b>? Nekkhammena kāmacchandaṁ vosajjatīti— vosagge paññā vimokkhavivaṭṭe ñāṇaṁ. Abyāpādena byāpādaṁ vosajjatīti— vosagge paññā vimokkhavivaṭṭe ñāṇaṁ. Ālokasaññāya thinamiddhaṁ vosajjatīti— vosagge paññā vimokkhavivaṭṭe ñāṇaṁ. Avikkhepena uddhaccaṁ vosajjatīti— vosagge paññā vimokkhavivaṭṭe ñāṇaṁ. Dhammavavatthānena vicikicchaṁ vosajjatīti— vosagge paññā vimokkhavivaṭṭe ñāṇaṁ …pe… arahattamaggena sabbakilese vosajjatīti— vosagge paññā vimokkhavivaṭṭe ñāṇaṁ. Taṁ ñātaṭṭhena ñāṇaṁ, pajānanaṭṭhena paññā. Tena vuccati— “vosagge paññā vimokkhavivaṭṭe ñāṇaṁ”. Kathaṁ tathaṭṭhe paññā <b>saccavivaṭṭe ñāṇaṁ</b>? Dukkhassa pīḷanaṭṭhaṁ saṅkhataṭṭhaṁ santāpaṭṭhaṁ vipariṇāmaṭṭhaṁ parijānanto vivaṭṭatīti— tathaṭṭhe paññā saccavivaṭṭe ñāṇaṁ. Samudayassa āyūhanaṭṭhaṁ nidānaṭṭhaṁ saññogaṭṭhaṁ palibodhaṭṭhaṁ pajahanto vivaṭṭatīti— tathaṭṭhe paññā saccavivaṭṭe ñāṇaṁ. Nirodhassa nissaraṇaṭṭhaṁ vivekaṭṭhaṁ asaṅkhataṭṭhaṁ amataṭṭhaṁ sacchikaronto vivaṭṭatīti— tathaṭṭhe paññā saccavivaṭṭe ñāṇaṁ. Maggassa niyyānaṭṭhaṁ hetuṭṭhaṁ dassanaṭṭhaṁ ādhipateyyaṭṭhaṁ bhāvento vivaṭṭatīti— tathaṭṭhe paññā saccavivaṭṭe ñāṇaṁ.