Bāhiro dhammo bāhirassa dhammassa indriyapaccayena paccayo—bāhirā indriyā sampayuttakānaṁ khandhānaṁ cittasamuṭṭhānānañca rūpānaṁ indriyapaccayena paccayo; paṭisandhikkhaṇe bāhirā indriyā sampayuttakānaṁ khandhānaṁ bāhirānañca kaṭattārūpānaṁ indriyapaccayena paccayo, rūpajīvitindriyaṁ bāhirānaṁ kaṭattārūpānaṁ indriyapaccayena paccayo. Bāhiro dhammo ajjhattikassa dhammassa indriyapaccayena paccayo—bāhirā indriyā cittassa indriyapaccayena paccayo; paṭisandhikkhaṇe bāhirā indriyā cittassa ajjhattikānañca kaṭattārūpānaṁ indriyapaccayena paccayo, rūpajīvitindriyaṁ ajjhattikānaṁ kaṭattārūpānaṁ indriyapaccayena paccayo. Bāhiro dhammo ajjhattikassa ca bāhirassa ca dhammassa indriyapaccayena paccayo—bāhirā indriyā sampayuttakānaṁ khandhānaṁ cittassa ca cittasamuṭṭhānānañca rūpānaṁ indriyapaccayena paccayo; paṭisandhikkhaṇe bāhirā indriyā sampayuttakānaṁ khandhānaṁ cittassa ca ajjhattikānañca bāhirānañca kaṭattārūpānaṁ indriyapaccayena paccayo, rūpajīvitindriyaṁ ajjhattikānañca bāhirānañca kaṭattārūpānaṁ indriyapaccayena paccayo. Ajjhattiko ca bāhiro ca dhammā ajjhattikassa dhammassa indriyapaccayena paccayo—paṭisandhikkhaṇe ajjhattikā ca bāhirā ca indriyā ajjhattikānaṁ kaṭattārūpānaṁ indriyapaccayena paccayo, cakkhundriyañca upekkhindriyañca cakkhuviññāṇassa indriyapaccayena paccayo …pe… kāyindriyañca sukhindriyaṁ ca …pe… kāyindriyañca dukkhindriyañca kāyaviññāṇassa indriyapaccayena paccayo.