Kilesasampayuttaṁ dhammaṁ paṭicca kilesasampayutto dhammo uppajjati hetupaccayā—kilesasampayuttaṁ ekaṁ khandhaṁ paṭicca tayo khandhā …pe… dve khandhe …pe…. Kilesasampayuttaṁ dhammaṁ paṭicca kilesavippayutto dhammo uppajjati hetupaccayā—kilesasampayutte khandhe paṭicca cittasamuṭṭhānaṁ rūpaṁ. (Kilesasampayuttadukaṁ saṅkiliṭṭhadukasadisaṁ, ninnānākaraṇaṁ.) Kilesasampayuttadukaṁ niṭṭhitaṁ. 2.12.5. Kilesasaṅkilesikaduka 2.12.5.1–7. Paṭiccādivāra Hetu Kilesañceva saṅkilesikañca dhammaṁ paṭicca kileso ceva saṅkilesiko ca dhammo uppajjati hetupaccayā—lobhaṁ paṭicca moho diṭṭhi thinaṁ uddhaccaṁ ahirikaṁ anottappaṁ. (Cakkaṁ.) Kilesañceva saṅkilesikañca dhammaṁ paṭicca saṅkilesiko ceva no ca kileso dhammo uppajjati hetupaccayā—kilese paṭicca sampayuttakā khandhā cittasamuṭṭhānañca rūpaṁ.