Kilesañceva saṅkilesikañca dhammaṁ paṭicca kileso ceva saṅkilesiko ca saṅkilesiko ceva no ca kileso ca dhammā uppajjanti hetupaccayā—lobhaṁ paṭicca moho diṭṭhi thinaṁ uddhaccaṁ ahirikaṁ anottappaṁ sampayuttakā ca khandhā cittasamuṭṭhānañca rūpaṁ. 2.12.5.2–6. Sahajāta-paccaya-nissaya-saṁsaṭṭha-sampayuttavāra (Evaṁ paṭiccavāropi sahajātavāropi paccayavāropi nissayavāropi saṁsaṭṭhavāropi sampayuttavāropi kilesadukasadisā. Ninnānākaraṇaṁ. Āmasanaṁ nānaṁ.) 2.12.5.7. Pañhāvāra 2.12.5.7.1–4. Paccayānulomādi Vibhaṅgavāra Hetu Kileso ceva saṅkilesiko ca dhammo kilesassa ceva saṅkilesikassa ca dhammassa hetupaccayena paccayo—kilesā ceva saṅkilesikā ca hetū sampayuttakānaṁ kilesānaṁ hetupaccayena paccayo (evaṁ cattāri, kilesadukasadisaṁ.) Ārammaṇa Kileso ceva saṅkilesiko ca dhammo kilesassa ceva saṅkilesikassa ca dhammassa ārammaṇapaccayena paccayo—kilese ārabbha kilesā uppajjanti. (Mūlaṁ kātabbaṁ.) Kilese ārabbha saṅkilesikā ceva no ca kilesā khandhā uppajjanti. (Mūlaṁ kātabbaṁ.) Kilese ārabbha kilesā ca sampayuttakā ca khandhā uppajjanti.