Akusalaṁ dhammaṁ nissāya akusalo dhammo uppajjati hetupaccayā—akusalaṁ ekaṁ khandhaṁ nissāya tayo khandhā …pe… dve khandhe nissāya dve khandhā. Akusalaṁ dhammaṁ nissāya abyākato dhammo uppajjati hetupaccayā—akusale khandhe nissāya cittasamuṭṭhānaṁ rūpaṁ. Akusalaṁ dhammaṁ nissāya akusalo ca abyākato ca dhammā uppajjanti hetupaccayā—akusalaṁ ekaṁ khandhaṁ nissāya tayo khandhā cittasamuṭṭhānañca rūpaṁ …pe… dve khandhe nissāya dve khandhā cittasamuṭṭhānañca rūpaṁ. Abyākataṁ dhammaṁ nissāya abyākato dhammo uppajjati hetupaccayā— vipākābyākataṁ kiriyābyākataṁ ekaṁ khandhaṁ nissāya tayo khandhā cittasamuṭṭhānañca rūpaṁ, tayo khandhe nissāya eko khandho cittasamuṭṭhānañca rūpaṁ, dve khandhe nissāya dve khandhā cittasamuṭṭhānañca rūpaṁ; paṭisandhikkhaṇe vipākābyākataṁ ekaṁ khandhaṁ nissāya tayo khandhā kaṭattā ca rūpaṁ, tayo khandhe nissāya eko khandho kaṭattā ca rūpaṁ, dve khandhe nissāya dve khandhā kaṭattā ca rūpaṁ; khandhe nissāya vatthu, vatthuṁ nissāya khandhā; ekaṁ mahābhūtaṁ nissāya tayo mahābhūtā, tayo mahābhūte nissāya ekaṁ mahābhūtaṁ, dve mahābhūte nissāya dve mahābhūtā, mahābhūte nissāya cittasamuṭṭhānaṁ rūpaṁ kaṭattārūpaṁ upādārūpaṁ; vatthuṁ nissāya vipākābyākatā kiriyābyākatā khandhā. Abyākataṁ dhammaṁ nissāya kusalo dhammo uppajjati hetupaccayā—vatthuṁ nissāya kusalā khandhā. Abyākataṁ dhammaṁ nissāya akusalo dhammo uppajjati hetupaccayā—vatthuṁ nissāya akusalā khandhā. Abyākataṁ dhammaṁ nissāya kusalo ca abyākato ca dhammā uppajjanti hetupaccayā— vatthuṁ nissāya kusalā khandhā, mahābhūte nissāya cittasamuṭṭhānaṁ rūpaṁ.