Anupādinnaanupādāniyaṁ dhammaṁ paccayā anupādinnaanupādāniyo dhammo uppajjati nakammapaccayā—kusale anupādinnaanupādāniye khandhe paccayā anupādinnaanupādāniyā cetanā. Upādinnupādāniyañca anupādinnaanupādāniyañca dhammaṁ paccayā anupādinnaanupādāniyo dhammo uppajjati nakammapaccayā—kusale anupādinnaanupādāniye khandhe ca vatthuñca paccayā anupādinnaanupādāniyā kusalā cetanā. Upādinnupādāniyañca anupādinnupādāniyañca dhammaṁ paccayā anupādinnupādāniyo dhammo uppajjati nakammapaccayā—anupādinnupādāniye khandhe ca vatthuñca paccayā anupādinnupādāniyā cetanā. Navipāka Upādinnupādāniyaṁ dhammaṁ paccayā upādinnupādāniyo dhammo uppajjati navipākapaccayā—asaññasattānaṁ ekaṁ mahābhūtaṁ paccayā …pe…. Upādinnupādāniyaṁ dhammaṁ paccayā anupādinnupādāniyo dhammo uppajjati navipākapaccayā; vatthuṁ paccayā anupādinnupādāniyā khandhā. Upādinnupādāniyaṁ dhammaṁ paccayā anupādinnaanupādāniyo dhammo uppajjati navipākapaccayā—vatthuṁ paccayā kusalā anupādinnaanupādāniyā khandhā. Anupādinnupādāniyaṁ dhammaṁ paccayā … ekā. Anupādinnaanupādāniyaṁ dhammaṁ paccayā … tīṇi. Upādinnupādāniyañca anupādinnaanupādāniyañca dhammaṁ paccayā anupādinnaanupādāniyo dhammo uppajjati navipākapaccayā. (Saṅkhittaṁ.)