Kusalaṁ dhammaṁ paccayā kusalo dhammo uppajjati āsevanapaccayā—kusalaṁ ekaṁ khandhaṁ paccayā …pe…. Akusalaṁ dhammaṁ paccayā akusalo dhammo uppajjati āsevanapaccayā—akusalaṁ ekaṁ khandhaṁ paccayā …pe…. Abyākataṁ dhammaṁ paccayā abyākato dhammo uppajjati āsevanapaccayā— kiriyābyākataṁ ekaṁ khandhaṁ paccayā tayo khandhā, tayo khandhe paccayā eko khandho, dve khandhe paccayā dve khandhā, vatthuṁ paccayā kiriyābyākatā khandhā. Abyākataṁ dhammaṁ paccayā kusalo dhammo uppajjati āsevanapaccayā—vatthuṁ paccayā kusalā khandhā. Abyākataṁ dhammaṁ paccayā akusalo dhammo uppajjati āsevanapaccayā—vatthuṁ paccayā akusalā khandhā. Kusalañca abyākatañca dhammaṁ paccayā …pe…. Akusalañca abyākatañca dhammaṁ paccayā akusalo dhammo uppajjati āsevanapaccayā—akusalaṁ ekaṁ khandhañca vatthuñca paccayā tayo khandhā …pe…. Kamma Kusalaṁ dhammaṁ paccayā kusalo dhammo uppajjati kammapaccayā—kusalaṁ ekaṁ khandhaṁ paccayā … tīṇi. Akusalaṁ dhammaṁ paccayā akusalo dhammo uppajjati kammapaccayā … tīṇi.