Abyākataṁ dhammaṁ paṭicca abyākato dhammo uppajjati naaññamaññapaccayā— vipākābyākate kiriyābyākate khandhe paṭicca cittasamuṭṭhānaṁ rūpaṁ; paṭisandhikkhaṇe vipākābyākate khandhe paṭicca kaṭattārūpaṁ; mahābhūte paṭicca cittasamuṭṭhānaṁ rūpaṁ kaṭattārūpaṁ upādārūpaṁ; bāhire mahābhūte paṭicca upādārūpaṁ; āhārasamuṭṭhāne mahābhūte paṭicca upādārūpaṁ; utusamuṭṭhāne mahābhūte paṭicca upādārūpaṁ; asaññasattānaṁ mahābhūte paṭicca kaṭattārūpaṁ upādārūpaṁ. Kusalañca abyākatañca dhammaṁ paṭicca abyākato dhammo uppajjati na aññamaññapaccayā—kusale khandhe ca mahābhūte ca paṭicca cittasamuṭṭhānaṁ rūpaṁ. Akusalañca abyākatañca dhammaṁ paṭicca abyākato dhammo uppajjati naaññamaññapaccayā—akusale khandhe ca mahābhūte ca paṭicca cittasamuṭṭhānaṁ rūpaṁ. Naupanissaya Kusalaṁ dhammaṁ paṭicca abyākato dhammo uppajjati naupanissayapaccayā—kusale khandhe paṭicca cittasamuṭṭhānaṁ rūpaṁ. (Naupanissayapaccayaṁ naārammaṇapaccayasadisaṁ.) Napurejāta Kusalaṁ dhammaṁ paṭicca kusalo dhammo uppajjati napurejātapaccayā—arūpe kusalaṁ ekaṁ khandhaṁ paṭicca tayo khandhā, tayo khandhe paṭicca eko khandho, dve khandhe paṭicca dve khandhā. Kusalaṁ dhammaṁ paṭicca abyākato dhammo uppajjati napurejātapaccayā—kusale khandhe paṭicca cittasamuṭṭhānaṁ rūpaṁ.