Sukhāya vedanāya sampayutto dhammo dukkhāya vedanāya sampayuttassa dhammassa kammapaccayena paccayo. <b>Nānākkhaṇikā</b>—sukhāya vedanāya sampayuttā cetanā vipākānaṁ dukkhāya vedanāya sampayuttakānaṁ khandhānaṁ kammapaccayena paccayo. Sukhāya vedanāya sampayutto dhammo adukkhamasukhāya vedanāya sampayuttassa dhammassa kammapaccayena paccayo. <b>Nānākkhaṇikā</b>—sukhāya vedanāya sampayuttā cetanā vipākānaṁ adukkhamasukhāya vedanāya sampayuttakānaṁ khandhānaṁ kammapaccayena paccayo. Dukkhāya vedanāya sampayutto dhammo dukkhāya vedanāya sampayuttassa dhammassa kammapaccayena paccayo—sahajātā, nānākkhaṇikā. <b>Sahajātā</b>—dukkhāya vedanāya sampayuttā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—dukkhāya vedanāya sampayuttā cetanā vipākānaṁ dukkhāya vedanāya sampayuttakānaṁ khandhānaṁ kammapaccayena paccayo. Dukkhāya vedanāya sampayutto dhammo adukkhamasukhāya vedanāya sampayuttassa dhammassa kammapaccayena paccayo. <b>Nānākkhaṇikā</b>—dukkhāya vedanāya sampayuttā cetanā vipākānaṁ adukkhamasukhāya vedanāya sampayuttakānaṁ khandhānaṁ kammapaccayena paccayo.