<b>Pakatūpanissayo</b>—sukhāya vedanāya sampayuttaṁ saddhaṁ upanissāya sukhāya vedanāya sampayuttena cittena dānaṁ deti, sīlaṁ samādiyati, uposathakammaṁ karoti, sukhāya vedanāya sampayuttaṁ jhānaṁ uppādeti, vipassanaṁ uppādeti, maggaṁ uppādeti, samāpattiṁ uppādeti, mānaṁ jappeti, diṭṭhiṁ gaṇhāti. Sukhāya vedanāya sampayuttaṁ sīlaṁ … sutaṁ … cāgaṁ … paññaṁ … rāgaṁ … mohaṁ … mānaṁ … diṭṭhiṁ … patthanaṁ … sukhasahagataṁ kāyaviññāṇaṁ upanissāya sukhāya vedanāya sampayuttena cittena dānaṁ deti …pe… samāpattiṁ uppādeti (saddhāpañcamakesu “mānaṁ jappeti, diṭṭhiṁ gaṇhātī”ti kātabbaṁ, avasesesu na kātabbaṁ). Sukhāya vedanāya sampayuttena cittena adinnaṁ ādiyati, musā bhaṇati, pisuṇaṁ bhaṇati, samphaṁ palapati, sandhiṁ chindati, nillopaṁ harati, ekāgārikaṁ karoti, paripanthe tiṭṭhati, paradāraṁ gacchati, gāmaghātaṁ karoti, nigamaghātaṁ karoti. Sukhāya vedanāya sampayuttā saddhā … sīlaṁ … sutaṁ … cāgo … paññā … rāgo … moho … māno … diṭṭhi … patthanā … sukhasahagataṁ kāyaviññāṇaṁ sukhāya vedanāya sampayuttāya saddhāya … sīlassa … sutassa … cāgassa … paññāya … rāgassa … mohassa … mānassa … diṭṭhiyā … patthanāya … sukhasahagatassa kāyaviññāṇassa … sukhāya vedanāya sampayuttakānaṁ khandhānaṁ upanissayapaccayena paccayo. Sukhāya vedanāya sampayutto dhammo dukkhāya vedanāya sampayuttassa dhammassa upanissayapaccayena paccayo.