Upādinnupādāniyaṁ dhammaṁ paccayā upādinnupādāniyo dhammo uppajjati nahetupaccayā—ahetukaṁ upādinnupādāniyaṁ ekaṁ khandhaṁ paccayā …pe… ahetukapaṭisandhikkhaṇe …pe… asaññasattānaṁ ekaṁ mahābhūtaṁ …pe… cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ; vatthuṁ paccayā ahetukā upādinnupādāniyā khandhā. Upādinnupādāniyaṁ dhammaṁ paccayā anupādinnupādāniyo dhammo uppajjati nahetupaccayā—ahetuke upādinnupādāniye khandhe paccayā cittasamuṭṭhānaṁ rūpaṁ; vatthuṁ paccayā ahetukā anupādinnupādāniyā khandhā; vatthuṁ paccayā vicikicchāsahagato uddhaccasahagato moho. Upādinnupādāniyaṁ dhammaṁ paccayā upādinnupādāniyo ca anupādinnupādāniyo ca dhammā uppajjanti nahetupaccayā—ahetukaṁ upādinnupādāniyaṁ ekaṁ khandhaṁ paccayā tayo khandhā cittasamuṭṭhānañca rūpaṁ …pe…. Anupādinnupādāniyaṁ dhammaṁ paccayā anupādinnupādāniyo dhammo uppajjati nahetupaccayā—ahetukaṁ anupādinnupādāniyaṁ ekaṁ khandhaṁ paccayā tayo khandhā cittasamuṭṭhānañca rūpaṁ …pe… bāhiraṁ … āhārasamuṭṭhānaṁ … utusamuṭṭhānaṁ ekaṁ mahābhūtaṁ …pe… rūpaṁ; vicikicchāsahagate uddhaccasahagate khandhe paccayā vicikicchāsahagato uddhaccasahagato moho.