Nevavipākanavipākadhammadhammaṁ paṭicca nevavipākanavipākadhammadhammo uppajjati nahetupaccayā—ahetukaṁ nevavipākanavipākadhammadhammaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe paṭicca dve khandhā cittasamuṭṭhānañca rūpaṁ, ekaṁ mahābhūtaṁ paṭicca tayo mahābhūtā …pe… dve mahābhūte paṭicca dve mahābhūtā, mahābhūte paṭicca cittasamuṭṭhānaṁ rūpaṁ kaṭattārūpaṁ upādārūpaṁ; bāhiraṁ … āhārasamuṭṭhānaṁ … utusamuṭṭhānaṁ … asaññasattānaṁ ekaṁ mahābhūtaṁ paṭicca tayo mahābhūtā …pe… mahābhūte paṭicca kaṭattārūpaṁ upādārūpaṁ. Nevavipākanavipākadhammadhammaṁ paṭicca vipāko dhammo uppajjati nahetupaccayā— ahetukapaṭisandhikkhaṇe vatthuṁ paṭicca vipākā khandhā. Nevavipākanavipākadhammadhammaṁ paṭicca vipāko ca nevavipākanavipākadhammadhammo ca dhammā uppajjanti nahetupaccayā—ahetukapaṭisandhikkhaṇe vatthuṁ paṭicca vipākā khandhā, mahābhūte paṭicca kaṭattārūpaṁ. Vipākañca nevavipākanavipākadhammadhammañca dhammaṁ paṭicca vipāko dhammo uppajjati nahetupaccayā—ahetukapaṭisandhikkhaṇe vipākaṁ ekaṁ khandhañca vatthuñca paṭicca tayo khandhā …pe… dve khandhe ca vatthuñca paṭicca dve khandhā.
