Upādinnupādāniyo dhammo upādinnupādāniyassa dhammassa vipākapaccayena paccayo— vipāko upādinnupādāniyo eko khandho tiṇṇannaṁ khandhānaṁ vipākapaccayena paccayo …pe… dve khandhā dvinnaṁ khandhānaṁ vipākapaccayena paccayo; paṭisandhikkhaṇe vipāko upādinnupādāniyo eko khandho tiṇṇannaṁ khandhānaṁ kaṭattā ca rūpānaṁ vipākapaccayena paccayo …pe… dve khandhā dvinnaṁ khandhānaṁ kaṭattā ca rūpānaṁ vipākapaccayena paccayo. Khandhā vatthussa vipākapaccayena paccayo. Upādinnupādāniyo dhammo anupādinnupādāniyassa dhammassa vipākapaccayena paccayo—vipākā upādinnupādāniyā khandhā cittasamuṭṭhānānaṁ rūpānaṁ vipākapaccayena paccayo. Upādinnupādāniyo dhammo upādinnupādāniyassa ca anupādinnupādāniyassa ca dhammassa vipākapaccayena paccayo—vipāko upādinnupādāniyo eko khandho tiṇṇannaṁ khandhānaṁ cittasamuṭṭhānānañca rūpānaṁ vipākapaccayena paccayo …pe… dve khandhā dvinnaṁ khandhānaṁ cittasamuṭṭhānānañca rūpānaṁ vipākapaccayena paccayo. Anupādinnaanupādāniyo dhammo anupādinnaanupādāniyassa dhammassa vipākapaccayena paccayo—vipāko anupādinnaanupādāniyo eko khandho tiṇṇannaṁ khandhānaṁ vipākapaccayena paccayo …pe… dve khandhā dvinnaṁ khandhānaṁ vipākapaccayena paccayo. Anupādinnaanupādāniyo dhammo anupādinnupādāniyassa dhammassa vipākapaccayena paccayo—vipākā anupādinnaanupādāniyā khandhā cittasamuṭṭhānānaṁ rūpānaṁ vipākapaccayena paccayo.