Kusalo dhammo abyākatassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—arahā maggā vuṭṭhahitvā maggaṁ garuṁ katvā paccavekkhati. <b>Sahajātādhipati</b>—kusalādhipati cittasamuṭṭhānānaṁ rūpānaṁ adhipatipaccayena paccayo. Kusalo dhammo kusalassa ca abyākatassa ca dhammassa adhipatipaccayena paccayo. <b>Sahajātādhipati</b>—kusalādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Akusalo dhammo akusalassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—rāgaṁ garuṁ katvā assādeti abhinandati; taṁ garuṁ katvā rāgo uppajjati, diṭṭhi uppajjati. Diṭṭhiṁ garuṁ katvā assādeti abhinandati; taṁ garuṁ katvā rāgo uppajjati, diṭṭhi uppajjati. <b>Sahajātādhipati</b>—akusalādhipati sampayuttakānaṁ khandhānaṁ adhipatipaccayena paccayo. Akusalo dhammo abyākatassa dhammassa adhipatipaccayena paccayo. <b>Sahajātādhipati</b>—akusalādhipati cittasamuṭṭhānānaṁ rūpānaṁ adhipatipaccayena paccayo. Akusalo dhammo akusalassa ca abyākatassa ca dhammassa adhipati paccayena paccayo. <b>Sahajātādhipati</b>—akusalādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo.