Abyākataṁ dhammaṁ paccayā abyākato dhammo uppajjati hetupaccayā— vipākābyākataṁ kiriyābyākataṁ ekaṁ khandhaṁ paccayā tayo khandhā cittasamuṭṭhānañca rūpaṁ, tayo khandhe paccayā eko khandho cittasamuṭṭhānañca rūpaṁ, dve khandhe paccayā dve khandhā cittasamuṭṭhānañca rūpaṁ; paṭisandhikkhaṇe vipākābyākataṁ ekaṁ khandhaṁ paccayā tayo khandhā kaṭattā ca rūpaṁ, tayo khandhe paccayā eko khandho kaṭattā ca rūpaṁ, dve khandhe paccayā dve khandhā kaṭattā ca rūpaṁ; khandhe paccayā vatthu, vatthuṁ paccayā khandhā; ekaṁ mahābhūtaṁ paccayā tayo mahābhūtā, tayo mahābhūte paccayā ekaṁ mahābhūtaṁ, dve mahābhūte paccayā dve mahābhūtā, mahābhūte paccayā cittasamuṭṭhānaṁ rūpaṁ kaṭattārūpaṁ upādārūpaṁ; vatthuṁ paccayā vipākābyākatā kiriyābyākatā khandhā. Abyākataṁ dhammaṁ paccayā kusalo dhammo uppajjati hetupaccayā—vatthuṁ paccayā kusalā khandhā. Abyākataṁ dhammaṁ paccayā akusalo dhammo uppajjati hetupaccayā—vatthuṁ paccayā akusalā khandhā. Abyākataṁ dhammaṁ paccayā kusalo ca abyākato ca dhammā uppajjanti hetupaccayā— vatthuṁ paccayā kusalā khandhā, mahābhūte paccayā cittasamuṭṭhānaṁ rūpaṁ. Abyākataṁ dhammaṁ paccayā akusalo ca abyākato ca dhammā uppajjanti hetupaccayā—vatthuṁ paccayā akusalā khandhā, mahābhūte paccayā cittasamuṭṭhānaṁ rūpaṁ.