Saṅkiliṭṭhasaṅkilesiko dhammo saṅkiliṭṭhasaṅkilesikassa ca asaṅkiliṭṭhasaṅkilesikassa ca dhammassa kammapaccayena paccayo—saṅkiliṭṭhasaṅkilesikā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo. Asaṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa kammapaccayena paccayo—sahajātā, nānākkhaṇikā. <b>Sahajātā</b>—asaṅkiliṭṭhasaṅkilesikā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo. Paṭisandhikkhaṇe …pe…. <b>Nānākkhaṇikā</b>—asaṅkiliṭṭhasaṅkilesikā cetanā vipākānaṁ khandhānaṁ kaṭattā ca rūpānaṁ kammapaccayena paccayo. Asaṅkiliṭṭhaasaṅkilesiko dhammo asaṅkiliṭṭhaasaṅkilesikassa dhammassa kammapaccayena paccayo—sahajātā, nānākkhaṇikā. <b>Sahajātā</b>—asaṅkiliṭṭhaasaṅkilesikā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—asaṅkiliṭṭhaasaṅkilesikā kusalā cetanā vipākānaṁ asaṅkiliṭṭhaasaṅkilesikānaṁ khandhānaṁ kammapaccayena paccayo. Asaṅkiliṭṭhaasaṅkilesiko dhammo asaṅkiliṭṭhasaṅkilesikassa dhammassa kammapaccayena paccayo—sahajātā asaṅkiliṭṭhaasaṅkilesikā cetanā cittasamuṭṭhānānaṁ rūpānaṁ kammapaccayena paccayo.