Akusalo dhammo akusalassa dhammassa ārammaṇapaccayena paccayo—rāgaṁ assādeti abhinandati; taṁ ārabbha rāgo uppajjati, diṭṭhi uppajjati, vicikicchā uppajjati, uddhaccaṁ uppajjati, domanassaṁ uppajjati. Diṭṭhiṁ assādeti abhinandati; taṁ ārabbha rāgo uppajjati, diṭṭhi uppajjati, vicikicchā uppajjati, uddhaccaṁ uppajjati, domanassaṁ uppajjati. Vicikicchaṁ ārabbha vicikicchā uppajjati, diṭṭhi uppajjati, uddhaccaṁ uppajjati, domanassaṁ uppajjati. Uddhaccaṁ ārabbha uddhaccaṁ uppajjati, diṭṭhi uppajjati, vicikicchā uppajjati, domanassaṁ uppajjati. Domanassaṁ ārabbha domanassaṁ uppajjati, diṭṭhi uppajjati, vicikicchā uppajjati, uddhaccaṁ uppajjati. Akusalo dhammo kusalassa dhammassa ārammaṇapaccayena paccayo—sekkhā pahīne kilese paccavekkhanti, vikkhambhite kilese paccavekkhanti, pubbe samudāciṇṇe kilese jānanti, sekkhā vā puthujjanā vā akusalaṁ aniccato dukkhato anattato vipassanti, cetopariyañāṇena akusalacittasamaṅgissa cittaṁ jānanti. Akusalā khandhā cetopariyañāṇassa, pubbenivāsānussatiñāṇassa, yathākammupagañāṇassa, anāgataṁsañāṇassa ārammaṇapaccayena paccayo.